6/4/15

அண்ணலின் ஆன்மா வாழ்கி’றது இங்கே …..


இந்த இனிய தேசத்தின் வரலாற்றில் அழியா இடம்பெற்றிருக்கும் சில மனிதர்கள் போல சில கட்டிடங்களும் உண்டு. அதில் ஒன்று புனே நகரில் இருக்கும் ஆகாகான்(AGAKHAN) மாளிகை. அண்ணல் காந்தியின் வாழக்கையின் நிகழந்த மறக்க முடியாத 2 சிலநினைவுகளுக்கு சாட்சியாக நின்ற இந்த மாளிகை, தனியாக நாடு இல்லாத ஒரு மன்னருடையது. முகம்மது நபியின் உறவினரின் வாரிசாக பெர்ஷிய நாட்டில்  பிறந்த முதலாம் ஆஹாகானை தொடர்ந்து வரும் பரம்பரயினர் முஸ்லீம் இனத்தின் ஒரு பிரிவினருடைய தலைவராகவும் மன்னராகவும் மதித்து போற்றப்படுபவர்கள்.  உலகின் பலநாடுகளில் பெரும் சொத்துக்கள் இருக்கும் உலகபணக்காரர்கள் பட்டியலில் இருப்பவர் இன்றைய கரீம் ஆகாகான்..உலகெங்கும் கல்வி, மருத்துத்துபணிகளுக்கு உதவுகிறது இவரது பல அறக்கட்டளைகள்

இவரது தாத்தா இந்தியாவிற்கு வந்த போதுவாங்கிய நிலத்தில் அந்த நாட்களில் இந்த பகுதியில் நிலவிய பஞ்சத்தின் வேலையிழந்த விவசாயிகளுக்கு வேலையும் கூலியும் கொடுத்து உதவுவதற்காக.1892ல் இந்த மாளிகையை எழுப்பியிருக்கிறார். 1000பேர் உழைப்பில் 5 ஆண்டுகாலம்  12 லட்சம் செலவில் உருவான இந்த மாளிகையில் மன்னர் குடும்பம் வாழந்த்தாக தெரியவில்லை. பிரிட்டிஷ் ஆட்சிகாலத்தில் இது அரசின்பொறுப்பில் இருந்தது. அதனால்1942ல் ”வெள்ளையனே வெளியேறு” என்ற போராட்டத்தை அறிவித்த அண்ணலையும் அவரது செயலாளர் மஹாதேவ்பாய் தேசாய், கஸ்தூர்பா,  சரோஜினி நாயுடு,சுசேதா கிருப்பளானி ஆகியோரும்  கைது செய்யபட்டு  இங்கே  இரண்டு ஆண்டுகள் சிறைவைக்கபட்டிருக்கிறார்கள்
அந்த காலகட்டம் காந்தியடிகளின் வாழ்க்கையில் மிக துயரமான நாட்கள். இந்த சிறைக்கு வந்த  ஒரே வாரத்தில்   அவருடன் கைது செய்யபட்ட 35 ஆண்டுகள் அவருடன் பணியாற்றிய அவரது செயலாளர் மஹாதேவ் பாய் ஜெயில் அதிகாரிகளூடன் தங்களுக்கு செய்தி தாட்கள் தரபடவில்லை என வாதாடிக்கொண்டிருக்கும் போது மாரடைப்பால் இறந்துவிடுகிறார்.

மாளிகையில் சிறையாக மாற்றப்பட்டிருந்த 6 அறைகள் இப்போது கண்காட்சி கூடங்களாகியிருக்கின்றன. அறைகளின் நடுவில் மாறுதலான காந்தி சிலைகள் நம்மை கவர்கின்றன.  சுற்று சுவரில் இருக்கும் குறிப்புகளும் படங்களும், அண்ணலின் பொருட்களும் அபூர்மானவை. அவரது செயலாளர் மரணம் குறித்து வைக்கபட்டிருக்கு இந்த குறிப்பைப் படிக்கும் போது மனம் நெகிழ்ந்தது நிஜம்.
மஹாதேவ்பாய்

யின் சடலத்தை குளிப்பாட்டி சந்தனமிட்டு பூக்கள் இட்டு  புத்தாடைஉடுத்தி  . ” இதையெல்லாம் நீ என் மரணத்துக்கு பின் எனக்கு  நீ தான்  செய்யப்போகிறாய் என நினைத்துகொண்டிருந்தேன்,  ஆனால் உனக்கு நான் செய்யும் துர்பாக்கிய நிலைக்கு என்னை ஆளாக்கிவிட்டுவிட்டு போய்விட்டாய்” என்று அழுதார்..
 மரணமடைந்த கைதியின் உடலை புதைக்கவேண்டியது அரசின் கடமை என்பதால் அந்த உடலை எடுத்துச்செல்ல லாரியுடன் போலீஸ் வந்தது. .”இறந்தவர் கிரிமினல் குற்ற கைதி இல்லை  அரசியில் கைதி அவருக்கு இந்த விதி பொருந்தாது, மேலும் இந்து சமய முறைகளின் படிஇறந்த மகனின் இறுதிச்சடங்குகளை செய்ய வேண்டியது தந்தையின் பொறுப்பு. மகனின் சடலத்தை மற்ற எவரிடமும் தந்தை கொடுக்க மாட்டார்”.  என்ற சொன்ன காந்தியிடம், இந்த சிறைகட்டிடத்தை விட்டு வெளியே போக உங்களுக்கு அனுமதியில்லை. என்கிறார் பிரிட்டிஷ் அதிகாரி. உங்கள் சிறை விதிகளை மதிக்கிறேன்.  அப்படியானால் இந்த மாளிகையின் தோட்டத்திலேயே அடக்கம் செய்ய வேண்டும் என்கிறார் காந்தி. திகைத்துபோன அதிகாரி  டெல்லியை தொடர்பு கொள்ள, அவர்கள் இங்கிலாந்தை தொடர்பு கொள்ள தந்திகள் பறக்கின்றன.  இறுதியில் காந்தியின் விருப்பத்தை நிர்வாகம் ஏற்கிறது. இந்த மாளிகையின் தோட்டத்திலேயே காந்தி தீ சட்டிஏந்தி இறுதிசடங்குகள் செய்ய மஹாதேவ் பாய் தேசாய் அடக்கம் செய்யபட்டார்..
இதைத்தொடர்ந்து நீண்டகாலம் நோய்வாய்பட்டிருந்த கஸ்தூரிபா காந்திக்கு டாக்டர்கள்   இங்கிலாந்திலிருந்து வந்த ஊசிமருந்துகளைச் செலுத்த காந்தி அனுமதிக்க வில்லை.    அவர் இறந்து போகிறார். அவரது உடலும் இந்த மாளிகையின் தோட்டத்திலேயே  தேசாயின் சமாதி அருகே அடக்கம் செய்யபட்டிருக்கிறது. கஸ்தூரிபா தன் இறுதி மூச்சை அண்ணலின் மடியையில் தான் விட்டிருக்கிறார். அந்த காட்சியை பெரிய அளவு ஓவியமாக்கி அந்த அறையில் நிறுத்தியிருக்கிறார்கள். மனதைத் தொடும் படம்.

இந்த சிறையிலிருந்த இரண்டு ஆண்டுகளும் ஜன 26ல் அண்ணல் இங்கு கொடியேற்றியிருக்கிறார்.. அவர் வாழ்வின் தொடர்புடைய இடம் என்பதால் காந்தியின் மறைவுக்கு பின் அவர் அஸ்தியின் ஒரு பகுதி இங்கு வைக்கபட்டிருந்த இடத்தில் நினைவுக்கல் எழுப்ப பட்டிருக்கிறது.

19 ஏக்கர் பரப்பில் 6ஏக்கர் பரப்பளவில்  கம்பீரமாக நிற்கும் இந்த அழகிய மாளிகையையும் தோட்டத்தையும் அண்ணலின் கொள்கைகளால் கவரப்பட்ட ஆஹாகான் இளவரசர் 1972ல் இந்தியாவந்தபோது இந்திய அரசுக்கே நன்கொடையாக கொடுத்திடுத்திருக்கும் செய்தி  மாளிகையைப் போல அவரது மனமும் பெரிது என்பதைச்சொல்லுகிறது
.

40களிலேயே ஒரு இஸ்லாமிய அரசரின் மாளிகையில்  ஆழ்ந்த மதப்பற்றுள்ள இரண்டு இந்துக்களின் சமாதி அமைக்குமளவுக்கு  நல்லுறவு இருந்த இந்த தேசத்தில் ஏன் மதங்களின் பெயரால்  இன்னமும் சச்சரவும் சண்டையும்   எழுந்துகொண்டிருக்கிறது?


படங்கள் :ரமணன்

20/3/15

புனே உயரமாகிக்கொண்டிருக்கிறது

அடுக்குமாடிவீடுகள் புனேயில் புதிதல்ல. 50 ஆண்டுகளுக்கு முன்னரே துவங்கிவிட்ட விஷயம். ஆனால் இப்போது பல அடுக்குமாடிகளுடன் களுடன் அதிகமான கட்டிடங்கள் மிக வேகமாக எழுந்திருக்கின்றன. 28  அல்லது 24  அடுக்குமாடி வீடுகள். 8 அல்லது 10 மாடி பிரமாண்ட அலுவலககட்டிடங்கள் நிறைய எழுந்திருக்கின்றன. எல்லா அடுக்குமாடி வீடுகளிலும். முதல் 4 மாடிகளுக்கு -1,-2,-3.-4 என நம்பரிட்டு 5  வது

மாடியைத்தான் முதல் மாடி என குறித்திருக்கிறார்கள். இது வாஸ்து சாஸ்த்திரமா இல்லை விதிமீறலை மறைக்கும் சமாச்சாரமா என தெரியவில்லை.   நான்கு புறமும்  அழகான பசுமை குன்றுகளால் சூழப்பட்ட புனே நகரில் அந்த குன்றுகளுக்கு 10 கீமி வரை கட்டிடங்கள் எழுப்ப கூடாது என்று சட்டமிருந்தது. சரத்பாவர் காலத்தில் விதிகள் தளர்த்தபட்டு இப்போது சுத்தமாக மறக்கபட்டு குன்றுகளுக்கு அருகிலேயே. கட்டிடங்கள் வளர்க்க பட்டுகொண்டிருக்கின்றன. இன்னும் சில ஆண்டுகளில் அந்த குன்றுகளிலும் இம்மாதிரி கட்டிடங்கள் எழந்து குன்றுகளே காணமல் போகலாம் நகரமே நான்கு திசைகளிலும் கான்கீரிட் காடுகளாக விரிந்து கொண்டிருக்கின்றன.  
ஹின்சஞ்ன்வாடி என்ற புறநகர் பகுதியில் அத்தனை முன்னணி சாப்ட்வேர் நிறுவனங்களும். பிரமாண்டமான பல கட்டிடங்களில் இயங்குகிறது. 138 ஏக்கரில் 3000 வீடுகளுடன் 200 அலுவலகங்களுடன் மாறிவரும் இந்தியாவின் முகத்தை காட்டும் ஷோகேஸ். தனியார் நிறுவனங்கள் உருவாக்கிகொண்டிருக்கிறார்கள். இதுபோல் இன்னும் மூன்று அருகே வரப்போகிறதாம். அலுவலகங்களுக்கு அருகிலேயே வசிக்க அடுக்கமாடிகள். Walk to work  என்ற வாழ்க்கை. பயண நேரம் மிச்சம் என சொல்லி அந்த நேரத்திலும் வேலை வாங்கும் புத்திசாலிகம்பெனிகள்.  பல கட்டிடங்களில் விளக்குகளை அணைப்பதே இல்லை. அமெரிக்க  கஸ்டமர்களின் பகல் நேர அலுவலகங்களுக்காக  இங்கே இரவெல்லாம் உழைக்கும். பெரிய இளைஞர் பட்டாளம்.  5 ஸ்டார் சம்பளம் வாங்குபவர்கள்  தெருவோர கையேந்திபவனில் வாங்கி பிளாட்பாரத்தில் உட்கார்ந்து ஜவா மொழியில் பேசிக்கொண்டே சாப்பிடுகிறார்கள். இம்மாதிரி கடைகள் 50க்கும் மேல் இருக்கிறது. ஆம்லெட் தோசை போடும் நம்மூர்காரர் கடையில் நல்ல கூட்டம். தமிழ் பாடல்களும் கேட்கிறது.

அடையாள அட்டையை அழுத்தினால் திறக்கும் கதவு. கிச்சனில்; புகைவந்தால் அலறும் அலாரம்  நடக்க நல்ல பாதைகள் மெத்தென்ற பசும்புல்வெளி பார்க்   நீச்சல் குளம், குழந்தைகள் விளையாட வெண்மணல்திடல்  கோல்ப்மைதானம் என மிக நவீன வசதிகளுடன் சுத்தமான குட்டி ஹைடெக் ஊர். கால்நகம்வெட்டிக்கொள்வதிலிருந்து சகல நகர வாழ்க்கையின் ஆடம்பரங்களும் இங்கேயே இருக்கிறது.
ஆனாலும்.  பனித்துளிகள் மின்னும்பயிர்களுடன் அருகிலிருக்கும் விளைநிலங்களையும் அதன் எதிரே மிதக்கும் மேகங்கள் தொட்டுசெல்லும்  உயர்ந்த கட்டிடங்களையும் நம் பால்கனியிலிருந்து ஒன்றாக பார்க்கும்போது ஒரு மாறுபட்ட வினோதமான  உணர்வு எழுகிறது.

”இன்னும் சில நாட்களில் நாங்கள் அங்கேயும் வந்துவிடுவோம்” என்று அந்த உயர்ந்த கட்டிடங்கள் சொல்லுவதைக்கேட்டு  அழும் அந்த நிலங்களின் கண்களில் நீர் கட்டியிருப்பது போல தோன்றிற்று. . 



  • 19 others like this.
  • Vedha Gopalan வாஸ்து சாஸ்த்திரமா இல்லை விதிமீறலை மறைக்கும் சமாச்சாரமா (ஏன் சார்! அதிகாரிகள் நேரில் வந்து பார்க்கும்போது கட்டடத்தின் உயரம்கூடவா கண்ணுக்குத் தெரியாது? ) இறைவா!!

    இந்தியாவின் முகத்தை காட்டும் ஷோகேஸ்

    கட்டிடங்களில் விளக்குகளை அணைப்பதே இல்லை.
    5 ஸ்டார் சம்பளம் வாங்குபவர்கள் தெருவோர கையேந்திபவனில்
    அழகிய வாக்கியங்கள் 

    . பனித்துளிகள் மின்னும்பயிர்களுடன்..நல்ல ரசனை தங்களுக்கு

    அய்யோ..அந்தக் கடைசி வரி மனசைப் பிசைகிறது!..சொல்லாதீங்க
    2 hrs · Edited · Like
  • Amirtham Surya நிலங்களின் கண்களில் நீர் கட்டியிருக்கிறது..செம ஜி
    2 hrs · Like
  • Bala Mukundhan அதே போல் பெங்களூரு தன் தனித்தன்மையை இழந்து வருடங்கள் பல ஆகி விட்டது. யஷ்வந்த்பூரிலிருந்து பனஷங்கரி செல்லும் Outer Ring Road வழியாகப் பயணித்தோமானால், குன்றுகள் அனைத்தும் அழிக்கப்பட்டு அதன் மேல் அடுக்கு மாடிக் கட்டிடங்களும், குடியிருப்புகளும்தான் தென் படுகின்றன. கார்டன் சிடி, கான்கிரீட் சிடியாக மாறி விட்டது. வட பெங்களுருவில் விமான நிலையம் செல்லும் வழியெங்கும் வயல் நிலங்கள் வானாளாவிய கட்டிடங்களைத் தான் தாங்கி நிற்கின்றன. Whitefield சுற்றிய பகுதியை பற்றி கேட்கவேவேண்டாம். இங்கே நிலங்களின் கண்களில் நீர் கூட கட்டாது. ஏனெனில், நீர் வழிந்தோட கூட இடமில்லாது கான்கிரீட் தரைகளும், கட்டிடங்களும் பூமிக்கும் மனிதனுக்கும் இடையே தடை எழுப்பியுள்ளது.

    இதை விட கோரம் ஒன்று உண்டென்றால், அது M G Road தான். எவ்வளவு அழகான ஒரு சாலையாக இருந்த அது இன்று உயர் மட்ட மெட்ரோ ரயில் பாதை அமைக்கப்பட்டதின் மூலம் தன்னிலை இழந்து ஒரு சவப்பாதையாக மாறியுள்ளது. 18 வருடம் கழித்து அந்தப் பாதையைப் பார்த்த என் கண்ணில் நீர்தான் முட்டிக் கொண்டு நின்றது. இந்த ஒரு வருடமாக அந்தப் பாதைப் பக்கமே செல்லவில்லை.
    2 hrs · Like
  • 1 hr · Like · 1
  • Shah Jahan இப்போதெல்லாம் கேடட் கம்யூனிட்டியில் வசிப்பதுதான் நாகரிகம் என்ற மனநிலை உருவாகிவிட்டது. கோவையில்கூட கேடட் கம்யூனிட்டி வந்தாயிற்று.
    1 hr · Like
  • Skrajendran S Krihsnasamy Naidu இன்னும் சில நாட்களில் நாங்கள் அங்கேயும் வந்துவிடுவோம்” என்று அந்த உயர்ந்த கட்டிடங்கள் சொல்லுவதைக்கேட்டு அந்த நிலங்களின் கண்களில் நீர் கட்டியிருப்பது போல தோன்றிற்று. 
    .
    1 hr · Like
  • Pitchumani Sudhangan கவிதை வடிவிலான ஒரு மனக் கலக்கத்தை, ஒரு சமூக அக்கறையை எத்தனை அழகாக ரசனையோடு சொல்லியிருக்கிறீர்கள் ரமணன் ஸார்!
    1 hr · Like · 1











16/3/15

வெற்றி வெளியே இல்லை- கல்கியில் விமர்சனம்



”வெற்றி வெளியே இல்லை” நூலை  மூத்த பத்திரிகையாளார் ‘சுப்ர பாலன்” இந்த வார(22/03/15) கல்கியில் விமர்சித்திருக்கிறார். அதை இந்த சுட்டியில் பார்க்கலாம் 

http://ramananvsv.blogspot.in/

8/2/15

கடைசிக்கோடு



என்னுடைய கடைசிக்கோடு புத்தகத்தை  திருப்பூர்  தமிழ்சங்கம் ”2013 இலக்கிய விருது”க்கு தேர்ந்தெடுத்து 5/2/15 அன்று விழாவில் பணப்பரிசும்,கேடயம், சான்றிதழ் தந்து கெளரவித்தார்கள்.. திருப்பூர்  தமிழ் சங்கம் தரும் இந்த விருது தனிமதிப்பு வாய்ந்தது..23 ஆண்டுகளாக தமிழின் சிறந்த படைப்புகளுக்கு வழங்குகிறார்கள்.
  அவர்கள் தேர்ந்தெடுக்கும் நடுவர்களின் குழுவை அறிவிக்க மாட்டார்கள். அதே போல்  அவர்களுக்கு வரும் படைப்புகளை நடுவர்களுக்கு அனுப்புதோடு சங்கத்தின் பணி முடிந்துவிடுகிறது. நடுவர்கள் முடிவுகளை அறிவித்தபின்  விருதுபெறும் படைப்பாளிகளை திருப்பூருக்கு அவர்கள் செலவில் அழைத்து  நல்ல முறையில் வரவேற்று வசதியாக தங்கவைத்து மகளின் திருமண விழாவிற்கு  வந்தவர்களைப்போல  அன்புடன் உபசரிக்கிறார்கள்.
விருது பெற்றவகளை விழா மேடையில் அமரச்செய்து விருதுகளை அளிக்கிறார்கள்.. விழா புத்தக கண்காட்சி அரங்கில் நடைபெற்றது. வாசிப்பதை நேசிக்கும் நல்ல மனிதர்கள் நிறைந்த மாபெரும் சபையில் மாலைகள் விழுந்ததால், . படைப்பாளிகளின் படைப்பின் பெருமையை பேசப்பட்டதால். விருதுபெற்றவர்கள்.உண்மையான கெளரவத்தை (சற்று கர்வத்தை கூட) உணர்கிறார்கள்.
தமிழறிஞர் சிலம்பொலி செல்லப்பன் அவர்களும் லேனா தமிழ்வாணனும் பங்கேற்று விருகள் வழங்கினார்கள்.  என் வாழ்வின் மகிழ்வான தருணம் அது.

திருப்பூர் தமிழ் சங்கத்தலவர் டாக்டர் ஆ. முருகநாதன், செயலர்  ஆடிட்டர் அ.லோக நாதன். இருவரும் தத்தம் தொழிலில் உச்சத்தில் இருப்பவர்கள்.. ஆனலும் தமிழ் இலக்கியத்திற்கான சேவைகளில் தங்களை அர்பணித்துக்கொண்டவர்கள்

 தமிழ் படைப்பாளிகள் அனைவரும்   எழுதுபவர்களுக்கு இத்தகைய உயரிய கெளரவம் அளிப்பதற்காக இவர்களுக்கு  நன்றி சொல்ல கடமைப்பட்டிருக்கிறார்கள்..
 திருப்பூர் டாலர் நகரம் என்பது தெரியும். பணத்தை மட்டும் நேசிக்காமல் தமிழையும் நேசிப்பவர்களும் நிறைந்த நகரம் என்பதையும் புரிந்து கொண்டேன்,  



1/2/15

தினமலர் வார மலர்


இன்றைய தினமலர் வாரமலர் மூத்தபத்திரிகையாளர் சுதாங்கன் எழுதியிருப்பது

பார்த்தது,படித்தது, ரசித்தது.
அந்த நெல்லைக் காரரின் புத்தகம் தபாலில் வந்தது!
பிறகு படிக்கலாம் என்று தான் புரட்டினேன்!
ஆனால் அந்த புத்தகம் என்னை அப்படியே உள்ளே இழுத்தது!
151 பக்கம் புத்தகத்தை ஒரே மூச்சில் படித்து முடித்தேன்!
புத்தகத்தின் தலைப்பு: நேருவின் ஆட்சி ! பதியம் போட்ட 18 ஆண்டுகள்!
எழுதியவர் ரமணன்!
இவரை எனக்கு 1980 களுக்கு முன்னாலிருந்தே தெரியும்!
நடுவில் பல ஆண்டுகள் அவருடைய வங்கி அதிகாரி வேலை அவர் அதிகமாக எழுதுவதிலிருந்து தள்ளி வைத்திருந்தது!
இப்போது படுவேகமாக எழுத ஆரம்பித்திருக்கிறார்!
எழுதுவதற்காக படிப்பது ஒரு வகை!
படிப்பதை ஒரு ஆர்வமான காதலாக கொண்டவர்கள் இன்னொரு வகை!
ரமணன் இரண்டாவது வகை!
அதனால்தான் இந்திய சுதந்திர ஆரம்ப நாட்களை இத்தனை ஆழமாகவும் அழுத்தமாகவும் இவரால எழுத முடிந்திருக்கிறது!
இது ரசனையுள்ள வாசகனுக்கான புத்தகம் மட்டுமல்ல! அரசு பணியில் சேர விரும்புகிறவர்களுக்காக ஒரு இந்திய சரித்திரத்தின் சுருக்கமான வரலாறு!
பா.ஜ.க ஆட்சிக்கு வந்தபிறகு நேரு ஆட்சி குறித்து பல விமர்சனங்கள் எழுந்திருக்கிறது!
திடிரென்று புதிய ஆட்சியாளர்கள் மறந்து போன வல்லபாய் படேலை தூக்கி வைத்துக் கொண்டாடுகிறார்கள்!
அவரை மதவாதி என்கிறது காங்கிரஸில் ஒரு கூட்டம் !
ஆனால் ஆர்.எஸ்.எஸ்.. இயக்கத்தை தடை செய்ய வேண்டுமென்று தீவிரமாக இருந்து அதை செய்தவர் அன்றைய உள்துறை அமைச்சர் படேல் என்பதை ஆழமாக பதிய வைத்திருக்கிறது இந்த நூல்!
பாரபட்சமற்ற ஒரு பத்திரிகையாளனுக்கே உரிய ஒரு நேர்மையான எழுத்தாளப் பார்வையை இந்த புத்தகத்தில் பார்க்கமுடிகிறது!
நேருவை போற்றவும், தூற்றவும் செய்வதற்கு முன்னால் படிக்க வேண்டிய மிக முக்கியமான புத்தகம் இது!
இன்றைய இந்தியாவின் பெருமைகள், சிறுமைகள் இரண்டிலுமே நேரு தான் கதாநாயகர்!
ஜனநாயகம்,நேர்மை, நல்லாட்சி , தொலைநோக்குப் பார்வை இவை நேரு ஆட்சிக் காலத்தின் அடையாளங்கள்!
மொழிப் பிரச்னை, எல்லைப் பிரச்னை, நதிநீர் விவகாரம், வெளியுறவுக் கொள்கை குளறுபடிகள் இதன் தொடக்கப் புள்ளியும் நேருவின் ஆட்சிக் காலமே!
காஷ்மீர் பிரச்னையை ஐ.நா. சபைக்கு கொண்டு போனதும் நேருதான் என்கிறார்கள்!
உண்மைதான்! அதை எந்தப் பின்னனியில் கொண்டு சென்றார்?
அதற்கு பதில் இங்கே உள்ளது!
சீனாவுடனான யுத்தத் தோல்விக்குக் காரணம் நேருவின் தவறான கணிப்பு என்கிறார்கள்!
இதன் பின்னனி என்ன ? இங்கே பதிவு உண்டு!
அடுத்த தலைமுறை மீது அக்கறை கொண்ட ஒரு சரியான மனிதரின் அக்கறையான பதிவு இந்த புத்தகம்!
இது சிக்ஸ்த் சென்ஸ் பப்ளிகேஷன் வெளியிடு!
(நன்றி: நெல்லை தினமலர் வாரமலர்!)

27/1/15

திட்ட குழுவின் புதிய அவதாரம்.- அவசியமா? அரசியலா?



பிரதமர் மோடியின் 2014 ஆம் ஆண்டின்   உணர்ச்சி மயமான சுதந்திர தின உரையில் அதிரடியாக அறிவிக்க பட்ட ஒரு விஷயம் 60 ஆண்டுகளுக்கும் மேலாக இருந்து வரும்  நாட்டின் திட்ட குழு  நீக்கபடும்.  அதற்கு பதிலாக ஒரு புதிய அமைப்பு நிறுவப்படும். என்பது. அறிவிக்கபட்ட படி மறுநாளே திட்டகுழு ஒழிக்கபட்டுவிட்டதின் அடையாளாமாக அதன் இணைய தளம் மூடப்பட்டு ஆவணகாப்பகமாக்கப்பட்டது.  ஆனால் திட்ட குழுவிற்கு மாற்றாக உருவாக்கபட்டிருக்கும் புதிய நிருவனத்தினைப் பற்றி அறிய நாடு ஆறு மாதம் காத்திருக்க வேண்டியிருந்தது. 
மோடி அரசின் புத்தாண்டு பரிசாக “நீதி ஆயோக்” என்ற அமைப்பு திட்ட குழுவிற்கு மாற்றாக அறிவிக்க பட்டது. இந்தியாவை மாற்றியமைக்கும் தேசிய அமைப்பு (என்.ஐ.டி.ஐ) என்கிற "நீதி ஆயோக்' இனிமேல் திட்டக் குழுவின் பணிகளை ஏற்று நடத்தும். திட்டக் குழு, "நீதி ஆயோக்' அல்லது மத்திய கொள்கைக் குழு என்று பெயரில் அழைக்கபடும் என தெரிவித்த அறிவிப்பில் மற்ற விபரங்கள் உடனேயே வெளியிடவில்லை.. தொடர்ந்து வெளியாகியிருக்கின்ற விபரங்கள் பல கேள்விகளை எழுப்புகின்றன.  
திட்ட கமிஷனின் வரலாறு.
திட்டமிடல் "Planing" என்பது ஒரு விசாலமான பார்வை. நாட்டை வளர்ச்சிப் பாதையில் கொண்டு போகும் பல அம்சங்களில் ஒரு பகுதி. அறிவையும் - ஆற்றலையும் இணைத்து மக்களுக்கு சேவை செய்வதற்காக பட்டை தீட்டப்பட்ட கனவு.
இந்தியாவில் திட்டமிடல் என்ற கொள்கையை உருவாக்கியவர்களில் மூன்று பேர் முக்கியமானவர்கள். முதலாவது, விஞ்ஞானி மெக்னாட் சாகா இரண்டாவது, பொறியாளர் எம்.விஸ்வேஷ்வரய்யா. மூன்றாவது ஸ்காட்லாந்து நாட்டவரான பல்துறை வல்லுனர் பேட்ரிக் கெட்டெஸ் (Patrick Geddes). இவர்கள் இந்திய விடுதலைக்கு பல காலம் முன்னரே பிறக்கப்போகும் புதிய தேசத்தின் வளர்ச்சிக்காக 1938லேயே  தொலை நோக்குடன் திட்டமிட துவங்கியவர்கள்
விஞ்ஞானியான சாகா காந்திய பொருளாதாரகொள்கைகளில் நம்பிக்கை இல்லாதவர். அறிவியல் அடிப்படையலான ஒரு சமூகம் பற்றிய கனவுகள் அவரிடம் நிறைய இருந்தது. 
போல்ஸ்விக் புரட்சிக்கு பின்னர் ரஷ்யாவின் லெனினின் திட்டமிட்ட வளர்ச்சி பாதையையே நாமும் முன்மாதிரியாக கொள்ள வேண்டும் என்ற கருத்தைக்கொண்டிருந்தார். .கனியூச சித்தாந்த்த்தில் நம்பிக்கை இல்லாத  பொறியிலாளாரான விஸ்வேஸ்வரய்யா தேசம் முழுவதுற்குமான பிரமாண்ட கட்டுமானங்கள் அணைகள் போன்ற திட்டங்களை தயாரித்துகொண்டிருந்தார். அன்றைய காங்கிரஸ் கட்சியின்  மாநாட்டில் திட்டமிடல் பற்றிய இந்த மாறுபட்ட கருத்துக்கள் விவாதிக்க பட்டிருக்கின்றன.   சீனாவின் ஐந்தாண்டு திட்டங்களை சென்று பார்த்தவந்திருந்த நேருவின் திட்டங்கள் பற்றிய பார்வை மக்கள் சார்ந்ததாக இருந்தது.  இறுதியில்  அரசியலையும், அறிவியலையும் உள்ளடக்கிய திட்டங்களை வடிவமைபதற்கு கட்சியில் தேசிய திட்டகுழு ஒன்று அமைக்கபட்டு அதன் தலைவராக ஜவஹர்லால் தேர்ந்தெடுக்கபட்டார்.

நாட்டின் விடுதலைக்குப் பின்னர் நாட்டின் முதல் பிரதமர் ஜவாஹர்லால் நேரு, 1950-ஆம் ஆண்டு, சக அமைச்சர்களை, மூத்த அதிகாரிகளை, சில பொருளாதார நிபுணர்களை அழைத்துப் பேசினார். அந்த கூட்டத்தில் தேசத்தில் வளர்ச்சியும் முன்னேற்றமும் விரைவாக நடைபெற வேண்டும். அதற்கு சோவியத் ரஷியாவின் பாணியில்  திட்டக் குழுவை ஏற்படுத்துவது பற்றி விவாதிக்க பட்டது நமக்கும் ரஷியாவுக்கும் ஆட்சி அமைப்பு முறை வித்தியாசமானது. அவர்களது சேமிப்பு 30 சதவீதம், நமது சேமிப்பு 5 சதவீதத்திற்கும் குறைவானது. அவர்களால் அதிக முதலீட்டைத் திரட்ட முடியும், நம் நாட்டில்பெரிய திட்டங்களுக்கு முதலீடுகளை அதிகம் திரட்டுவது கடினம் என்பது ஆதிகாரிகளின் வாதமாக இருந்தது..
இருப்பினும் நாட்டில் சீரான, முறையான வளர்ச்சிக்கு திட்டமிடுதல் அவசியம். திட்டக் குழுவும் அவசியம் என்று முடிவு எடுக்கப்பட்டது. 1950 மார்ச் 15-ஆம் நாளன்று திட்டக் குழு அமைக்கப்பட்டதாக அதிகார பூர்வமாக அறிவிக்கப்பட்டது.
தீட்டிய திட்டங்களை செயல்படுத்துவதில் பிரதமர் நேரு மிகுந்த  ஆர்வத்தையும், அர்ப்பணிப்பையும்.காட்டினார். அமைச்சரவை கூட்டங்களில் திட்டங்களின் முக்கியப் பகுதிகளை எடுத்து விளக்குவார்.திட்டங்கள் செயல்படும் விதத்தையும், வேகத்தையும் அடிக்கடி தானே ஆய்வு செய்வார். அரசு இயந்திரத்தை முடுக்கிவிட்ட தோடு, வல்லுனர்களின் ஆலோசனைகளும், ஒத்துழைப்பும் திட்டக் குழுவுக்குக் கிடைப்பதை உறுதி செய்தார்அப்படி உதவிய மேதைகளின் பட்டியலில்,  பெரிது. புள்ளியியல் நிபுணர் மகனலோபிஸ், பொருளாதார மேதை பி.எஸ்.லோகநாதன், வேளாண் விஞ்ஞானி எம்.எஸ். சுவாமிநாதன், மேதை பிதாம்பர் பட் ஆகியோர் முக்கியமானவர்கள்.. .
அதேபோல், மேல் நாட்டு அறிஞர்கள் சுமார் 15 பேர் இந்தியாவுக்கு வந்து, தங்கி திட்டக் குழுவுக்கு வழிகாட்டியிருக்கிறார்கள்.. நமது நாட்டுக்கு திட்டமிட வெளிநாட்டு நிபுணர்கள் அவசியமா? என  விமர்சிக்கப்பட்டதற்கு நேரு சொன்ன பதில்  "நான் வெளிநாட்டுப் பொருள்களை இறக்குமதி செய்ய விரும்பவில்லை. மாறாக, வெளிநாட்டிலிருந்து சிறந்த நவீன சிந்தனைகளை இறக்குமதி செய்ய விரும்புகிறேன்' 
இத்தகைய பின்புலத்தில் பிறந்த,, தொடர்ந்து 60 ஆண்டுகள் இயங்கி வந்த, பல முறை விமர்சிக்கபட்ட திட்டகமிஷன்  அமைப்பு தான் இப்போது  தேவை இல்லை என ஒழிக்க பட்டிருக்கிறது. 
இந்த திட்ட குழு வே தேவையில்லை என குரல் எழுந்திருப்பது இது முதல் முறையில்லை. திட்டக் குழு பிறக்கும் போதே, . "நிதி திரட்டுவதையும், ஒதுக்குவதையும் நிதி அமைச்சகமும், பிற அமைச்சகங்களும் பார்த்துக் கொள்ள முடியும். திட்டக் குழு தேவை இல்லை. அது நிதி அமைச்சகத்தின் முக்கியத்துவத்தைக் குறைத்து விடும்' என்று எதிர்ப்புத் தெரிவித்து, தன் பதவியையே ராஜிநாமா செய்திருக்கிறார் அன்றைய நிதி அமைச்சர் ஜான் மத்தாய்.
திட்ட இலக்குகள், அதில் முன்னுரிமை போன்றவைகளை இந்த திட்டகுழுவே முடிவு செய்தது. முதல் திட்டத்தில் விடுபட்டு இறுதியில் அசோக் மேத்தா சுட்டிகாட்டிய பின்னர் சேர்க்க்க பட்ட விஷயம் வேலைவாய்ப்புகளை உருவாக்குதல். அறிவியல் ரீதியாக திட்டங்கள் வகுப்படவேண்டும் என்பதை நேரு விரும்பினாலும், உடன் இருந்தவர்கள் பலவித நம்பிக்கைகளூம் எண்ணங்களும் கொண்டவர்களாக இருந்தனர். நாட்டின் முதல் ஐந்தாண்டு திட்ட அறிக்கை திட்டகுழுவின் ஒப்புதலுக்கான கூட்டத்திற்கு  குறிக்க பட்ட நாள் 07/07/1951.மாலை 7 மணி. எல்லாவகையான சோதிடத்திலும் நம்பிக்கை கொண்டிருந்த  அமைச்சர் நந்தா தேர்ந்தெடுத்தது இது. எல்லாவற்றிலும் 7 என்ற எண் வருகிற்து என்பது காரணம்.  இதில் எல்லாம் நமபிக்கை இல்லாத நேரு  மாலையில் வேறு நிகழ்ச்சி இருப்பதால் நேரத்தை மாற்றச் சொன்னார்.  மாற்றிய நேரம் 3.30.மணி 7ல் பாதி  வருவதால் பாதகமில்லை என அமைச்சர் நந்தா ஏற்றார்.  இப்படி அறிஞர்களின் கருத்துகளுக்கும் தனிநபர்களின் நம்பிக்கைகளுக்கும் மதிப்பு கொடுக்கபட்டு    உருவாகி, அறிஞர்களின் வழி காட்டுதலில் இயங்கி வந்த திட்டக் குழுதான் இப்போது கலைக்க பட்டிருக்கிறது.
ஏன் மோடி அரசு இந்த குழுவை கலைத்தது? 
இந்தியாவின் பொருளாதார வளர்ச்சி விகிதம், முதல் 5 ஆண்டுத் திட்ட காலத்தில் (1951-1956) 3.5 சதவீதம் மட்டுமே. அது 6-ஆவது திட்ட காலத்தில் 5.5 ஆகக் கூடியது. 10-ஆவது திட்ட காலத்தில் 7.6 சதவீதமாகவும், 11-ஆவது திட்ட காலத்தில் 7.9 சதவீதமாகவும் (2007-2012) உயர்ந்துள்ளது. 12-ஆவது திட்ட காலத்தில் (2012-2017) இந்த வளர்ச்சி விகிதத்தை 8 சதவீதமாக ஆக்க வேண்டும் என்பதே திட்டக் குழுவின் இலக்காகும்.
உலகமே பொருளாதார மந்தத்தில் சிக்கியிருக்கும் இன்றைய சூழலில், இத்தகைய பொருளாதார வளர்ச்சி திருப்திகரமானது மட்டுமல்ல, பாராட்டத் தக்கதும் கூட என்பது உலகலவிளவில் பல பொருளாதார நிபுணர்கள் ஏற்று கொண்ட கருத்து.
.ஆனால் இன்று ஆளும் கட்சியாக பொறுப்பு ஏற்றிருக்கும் பிஜெபியின் பார்வை வேறாக இருக்கிறது. 
இந்தியா சுதந்திரம் அடைந்திருந்த நிலையில் திட்டக் குழுவுக்கான அவசியம் இருந்தது. அதுவரை தனித்தனியாக இயங்கி வந்த பல சமஸ்தானங்களையும், பிரிட்டிஷ் ஆளுநர்களால் நிர்வகிக்கப்பட்ட பகுதிகளையும் ஒருங்கிணைத்து இந்தியா என்கிற நாடு உருவாகி இருந்த காலகட்டம் அது. இந்தச் சூழலில் சமச்சீரான வளர்ச்சியை உறுதி செய்தால் மட்டுமே, ஒருங்கிணைந்த இந்தியாவை ஒற்றுமை குலையாமல் காப்பாற்ற முடியும் என்கிற நிலைமை.
விவசாயம் சார்ந்த தேசமான இந்தியாவில் நீர்ப்பாசன வசதிகளோ, நீர்ப்பாசனத்தை உறுதி செய்யும் நீர்ப்பாசனத் திட்டங்களோ அப்போது கிடையாது. அதேபோல, தொழிற்சாலைகள் என்று எடுத்துக் கொண்டால் நூற்பாலைகள் மட்டும்தான். அதுவும் இந்தியாவின் ஒரு சில நகரங்களில் மட்டுமே காணப்பட்டன. கனரக தொழிற்சாலைகளை நிறுவுவதற்கான முதலீடு தனியார் துறையிடம் இல்லாமல் இருந்த நிலைமை.
அப்படிப்பட்ட சூழலில், இந்தியாவின் அடிப்படைத் தேவைகளை நிறைவு செய்து கொள்ளவும், சமச்சீரான வளர்ச்சிக்கு அடித்தளம் அமைக்கவும், நீர்ப்பாசன, நீர்மின் நிலையத் திட்டங்களை நிறுவுவதற்கும் அரசால் மட்டுமே முதலீட்டைக் கொணர முடியும் என்கிற சூழலில் திட்டக் குழுவுக்கு முக்கியப் பங்கு இருந்தது. வெளிநாடுகளிலிருந்து அரசு கடனுதவி பெற்று, கட்டமைப்பு வசதிகளைப் பெருக்கவும், கனரகத் தொழிற்சாலைகளை சமச்சீராக பல்வேறு மாநிலங்களில் நிறுவவும் திட்டமிடல் தேவைப்பட்டது.
1991-இல் பொருளாதார சீர்திருத்தமும், தனியார்மயமும் வந்தபோது, திட்டக் குழுவின் அவசியம் குறைந்துவிட்டது. காலப்போக்கில் திட்டக் குழு என்பது தேசத்தின் நிதி வருவாயை, மாநிலங்களுக்குப் பிரித்துக் கொடுக்கும் அமைப்பாகவும், மாநிலங்கள் அந்த நிதி ஒதுக்கீட்டை எப்படி செலவு செய்கின்றன என்பதைக் கண்காணிக்கும் அமைப்பாகவும் மாறிவிட்டது.
இந்த நிலையினால் இன்று இப்படி ஒரு திட்ட குழு அவசியமில்லை. மாறாக இன்றை சூழலுக்கு ஏற்ப இந்தியாவை மாற்றியமைக்கும் தேசிய  என்ற அமைப்பு (என்.ஐ.டி.ஐ) தேவை அது இந்த திட்டமிடலை செய்யும் என மோடியின் அரசு அறிவித்திருக்கிறது. 
 உலகமயமாதல் அடிப்படையில் கார்ப்பரேட்டுகள் வளரவும்,  மெல்ல பொதுத்துறை தனியார் வசமாவதுமாக எழுந்திருக்கும் இன்றைய சூழலில் திட்டக்குழுவே தேவை இல்லை என்பது பிஜபியின் வாதம்.  நியாயமாகப் பார்த்தால் கி.பி. 2000-த்திலேயே திட்டக்குழு கலைக்கப்பட்டிருக்க வேண்டும். ஏனெனில், தனியார்மயமாதல் மற்றும் கார்ப்பரேட்டுகள் வளர்ச்சி தேவை என்ற சூழ்நிலை வந்துவிட்ட பின் திட்டக் குழுவுக்கு வேலை இல்லையே! கடந்த 15 ஆண்டுகளாக ஓய்வுபெற்ற நிதித் துறைச் செயலாளர்களுக்ம், வேறு துறை நிபுணர்களும் பழைய செல்வாக்குடனும், அதிகார மிடுக்குடனும் வலம்வரக்கூடிய ஒரு புகலிடமாக மாறிவிட்டது.
இப்போது  தொழிற்துறையில் அரசின் முலதனம் குறைந்துவிட்டது. தனியார் மூதலீடுகள் உயர்ந்து கொண்டிருக்கின்றன அதனால் இந்த திட்ட கமிஷன் அவசியமில்லை என்ற காரணத்தை தாண்டி வேறு சில அரசியல் காரணங்களும் இருக்கின்றன.
மத்திய அரசின் ஆட்சியில் இருக்கும் கட்சியின் கைப்பாவையாக கடந்த 20 ஆண்டுகளாகத் திட்டக் குழு செயல்பட்டு வந்தது. தங்களுக்குச் சாதகமாக உள்ள மாநில அரசுகளுக்கு அதிக ஒதுக்கீடும், எதிர்க்கட்சி ஆட்சியில் இருக்கும் மாநிலங்களுக்கு பாரபட்சமான ஒதுக்கீடும் திட்டக் குழுவால் செய்யப்படுவதாக தொடர்ந்து சில மாநில அரசுகள் குரல் எழுப்பி கொண்டிருந்தது.. திட்டகுழு புள்ளிவிபரங்களுடன் மறுத்தாலும், மாநில முதலமைச்சர்கள் குரல் எழுப்பி கொண்டிருந்தனர். அப்படி குரல் எழுப்பியவர்களில் அன்று மாநில முதல்வராக இருந்த மோடியும் ஒருவர். 
 ஒவ்வொரு ஆண்டும் மாநில முதலமைச்சர்கள் கூட்டத்தை திட்டக் குழு நடத்துவதுண்டு.  ஆனால் இது ஒரு அரசின் சடங்காகிவிட்டது.  கடந்த ஆட்சி காலத்தில் அப்படி ஒரு முறை அந்தக் கூட்டத்தில் பங்கேற்ற தமிழக முதல்வர் ஜெயலலிதா, கூட்ட முடிவில் பேட்டி அளித்தபோது, "தில்லிக்கு வந்து திட்டக் குழுக் கூட்டத்தில் கலந்துகொண்டு நான் பேசிய பிறகு, அலுவாலியா "உங்கள் திட்டச் செலவுக்கான நிதி ஆதாரத்தை நீங்களே தேடிக் கொள்ள வேண்டியதுதான் என்று கூறுகிறார். இந்தப் பதிலைக் கேட்க எனக்கு ஒரு தில்லிப் பயணம் தேவைதானா?' என்றார். தமிழ்நாடு மட்டுமல்ல, ஐக்கிய முற்போக்கு கூட்டணி இல்லாத இதர மாநில முதலமைச்சர்கள் எல்லோருக்கும் அதே பதில்தான். மோடி முதலமைச்சராயிருந்த காலகட்டத்தில் திட்டக் குழுவுடன் பலமுறை மோதல்கள் நிகழ்ந்ததுண்டு. ஆகவே, திட்டக்குழுவுக்கு மோடி முடிவு கட்டுவார் என்பது எதிர்பார்த்ததுதான்.
திட்ட குழு என்ற அமைப்பு அரசியலமைப்புச் சட்ட அதிகார எல்லைகளுக்கு உட்பட்டதில்லை. சுயாட்சி கொண்ட அமைப்பு. அதனால் ஒரு அறிவிப்பின் மூலம் அதை மோடியால் கலைக்க முடிந்துவிட்டது.

புதிய அமைப்பு- அரசியல் வாதிகளின் பார்வை 
எதிர்பார்த்த படி இந்த புதிய திட்டமிடும்  அமைப்புக்கு  எல்லா அரசியல் கட்சிகளிடையேயும்  வரவேற்பு இல்லை  தமிழகத்தில் மத்திய அரசின் அறிவிப்புகளையும், திட்டங்களையும் ஆழந்து ஆராயும் பாமா கட்சியின் நிறுவனர் ராமதாஸ் இதை வரவேற்கவில்லை. அவர் “

” சீர்திருத்தம் என்ற பெயரில் செய்யப்படும் இந்த தொலைநோக்கற்ற மாற்றத்தால் ஏற்படும் நன்மைகளை விட பாதிப்புகள் தான் அதிகமாக இருக்கும். தொடக்கத்தில் திட்டக் குழு அதன் பணியை சிறப்பாகவே செய்து வந்தது. அதன்பின் பல மாற்றங்கள் ஏற்பட்டுள்ள நிலையில், மத்திய திட்டக் குழுவை சீரமைக்க வேண்டிய  தேவை ஏற்பட்டிருப்பது என்னவோ உண்மை தான். ஆனால்,  திட்டக் குழுவையே அடியோடு கலைத்துவிட்டு புதிய அமைப்பை ஏற்படுத்துவது தேவையில்லாதது.
இதுவரை நடைமுறையில் இருந்த மத்திய திட்டக் குழு வளர்ச்சிக்கு வழி வகுத்தது ஒருபுறமிருக்க, மாநிலங்களுக்கு நிதி ஒதுக்குவதில் சமநிலையை பராமரிக்கும் ஒழுங்குமுறை அமைப்பாக செயல்பட்டது. ஆனால், புதிதாக ஏற்படுத்தப்பட்டுள்ள நிதி ஆயோக், வளர்ச்சி மற்றும் கொள்கை தொடர்பான விஷயங்களில் மத்திய அரசுக்கு ஆலோசனை கூறும் அமைப்பாக திகழுமே தவிர முடிவெடுக்கும் அதிகாரம் கொண்டதாக இருக்கும் என்று தோன்றவில்லை.
 தனியார் துறையினர் அல்லது பெரு நிறுவனங்களின் வளர்ச்சி தான் இந்தியாவின் வளர்ச்சி என்று கருதும் மெத்தப்படித்த வல்லுனர்கள் நிதி ஆயோக்கில் இடம் பெறும் பட்சத்தில், அவர்களின் நோக்கம் என்னவாக இருக்கும் என்பதை சொல்லித் தெரியவில்லை. மேலும் இத்தகைய வல்லுனர்கள் பொதுவாக மானியங்களுக்கு எதிரானவர்களாக இருப்பர் என்பதால், கல்வி, சுகாதாரம், விவசாயம் போன்ற ஆக்கபூர்வமான பயன்பாட்டுக்கான மானியங்களையும் குறைக்கும்படி நிதி ஆயோக் நெருக்கடி எழும். அதற்கு அரசு பணிந்தால் அனைவருக்கும் பயனளிக்கும் வளர்ச்சியை ஏற்படுத்த முடியாது.
மத்திய திட்டக்குழு இருந்தவரை அதன் ஒப்புதல் பெறாமல் மத்திய அரசு திட்டங்கள் எதையும் செயல்படுத்த முடியாது. அதுமட்டுமின்றி, மாநில அரசுகளுக்கான திட்ட ஒதுக்கீட்டை திட்டக்குழு தான் தீர்மானிக்கும். இதில் பாகுபாடு காட்டப்படாமல் இருப்பதற்காக நிலையான விதிகள் வகுக்கப் பட்டிருந்தன. ஆனால், புதிய அமைப்புக்கு அத்தகைய அதிகாரங்கள் எதுவும் இல்லை. எனவே, மாநில அரசுகளுக்கு நிதி ஒதுக்குவதாக இருந்தாலும், மத்திய அரசின் திட்டங்களுக்கு அனுமதி அளிப்பதாக இருந்தாலும் பிரதமரின் முடிவு தான் இறுதியாக இருக்கும். அத்தகைய சூழலில் பாரதிய ஜனதா ஆளும் மாநிலங்களுக்கு அதிக நிதியும், மற்ற மாநிலங்களுக்கு குறைவான நிதியும் ஒதுக்கப்பட வாய்ப்புள்ளது. இதற்கெல்லாம் மேலாக எல்லா அதிகாரங்களும் பிரதமரிடம் குவிக்கப்பட்டால், அது நன்மைக்கு வழி வகுக்காது; மாறாக, நாட்டில் சர்வாதிகாரம் பெருகுவதற்குத் தான் வழி வகுக்கும்.
மத்திய, மாநில அரசுகளுக்கிடையிலான உறவுகளை பாதிக்கும் இந்நடவடிக்கை மிகவும் ஆபத்தானது ஆகும்.
எனவே, மத்திய திட்டக்குழுவுக்கு மாற்றாக புதிய அமைப்பை உருவாக்கும் அறிவிப்பை இரத்து செய்ய வேண்டும். ஏற்கனவே செயல்பட்டு வந்த திட்டக்குழுவை சீரமைத்து செயல்படுத்த வேண்டும்.” என  அறிக்கை வெளியிட்டிருக்கிறார். 
நாடளுமன்றத்தில் எந்த விவாதமும் இல்லாமல் ஒர் பொது கருத்தை உருவாக்கமல் இப்படி அதிரடியாக செய்வது அதிகாரங்களை தங்கள் வசப்படுத்திகொள்வது ஜனநாயகமில்லை என இடது சாரிகட்சிகளும் அறிவித்திருக்கின்றன.
புதிய அமைப்பு
இந்த புதிய அமைப்பிற்கு NATIONAL INSTITUON OF TRANSFORMING INDIA (NITI) என்று பெயரிடப்பட்டிருக்கிறது இதன் சுருக்கமாக  NITI (நீதி)  என அழைக்கபடும்.இதன் தலைவர் பிரதமர். துணைத்தலைவரும் ஒரு தலைமைச் செயல் அதிகாரியும் முழுநேர பணியாளாராக இருப்பார்கள். பல்கலைகழகங்களிலிருந்து இரண்டு பகுதி நேர உறுப்பினர்கள் மற்றும் நான்கு மத்திய அமைச்சர்களும் குழுவிலிருப்பார்கள். எல்லா மாநில முதல்வர்கள், யூனியன் பிரதேச துணை ஆளுனர்கள் கொண்ட  நிர்வாக குழுவும் இயங்கும். இதைத்தவிர அண்டை மாநிலங்களுடன் இணைந்த வட்டார கவுன்சில்கள் அமைக்க படும். தேசிய வளர்ச்சி திட்டங்களுக்கான முன்னுரிமைகளும், துறைகளும், அதற்கான  வழிமுறைகளையும் மாநில அரசுகளின் பங்கேற்புடன் உருவாக்கப்பட வேண்டும் என்பது இதன் முக்கிய குறிக்கோளாக அறிவிக்கபட்டிருக்கிறது. இதை அறிவிக்கும் போது பிரதமர் co-opertive fedralisim  ”மாநிலங்களின் கூட்டுறவு” என்ற வாசகத்தைப் பயன்படுத்தியிருக்கிறார். 
இந்த அமைப்பின் முக்கிய நோக்கம், சோஷலிச பார்வை கொண்ட திட்டகமிஷனின் பணிகளை இன்றைய  சுழலுக்கு ஏற்ப மாற்றியமைப்பது, இதில் பேசப்படும் இரண்டு முக்கியமான விஷயங்கள் 
1)திட்டங்களில் “மேலிருந்து கீழ்” என்ற  முறையை மாற்றி திட்டங்கள் கிழீருந்து அதாவது . திட்டங்கள் மேலே வகுக்கப்பட்டு கீழே திணிக்கப்படுகிறது. மாறாக, கீழே இருந்து திட்டங்கள் உருவாகி மேலே செல்ல வேண்டும் என்பதாகும்.
2) மாநிலங்களுக்கு நிதி ஒதுக்கீடு செய்வதில் பாரபட்சம் காட்டப்படுகிறது 
இந்த புதிய அமைப்பின் திட்டங்களையும், இருக்கும் திட்டகுழு செயல்பாடுகளையும் ஒப்பீடும் முன்  இப்போதிருக்கும் திட்ட குழு இயங்கும் முறைகளை பார்ப்போம்.
தற்போது  நடைமுறையில், ஒவ்வொரு துறையிலும் (விவசாயம், கல்வி, மருத்துவம்) உள்ள மாவட்ட அளவிலான நிர்வாகிகள் களத் தேவைகளை அறிந்து, கலந்து பேசி, திட்டங்களை தனது துறையின் மாநிலத் தலைவருக்கு அனுப்புகிறார்கள்.
அவைகளை ஆய்வுக்குப்பின், துறைத் தலைவர்கள் மாநிலத் திட்டக் குழுவுக்கு அனுப்புகிறார்கள். அது, முதல் அமைச்சர் தலைமையிலான நிரந்தர நிதிக் குழுவினால் விவாதிக்க பட்டு  முழுவடிவம் பெறுகிறது. அதன்பின் மத்திய திட்டக் குழுவிற்கு அனுப்பப்பட்டு விவாதத்திற்குப் பின்பு ஒப்புதல் தரப்படுகிறது. இது தான் உண்மையில் கீழிருந்து மேல் திட்டம். இதில் என்ன மாற்றம் வரப்போகிறது என்பதை பொறுத்துதிருந்துதான் பார்க்க வேண்டும்
அடுத்தது நிதி ஒதுக்கீடு.  இந்த ஒதுக்கீடு சில அடிப்படை விதிகளின்படி விகிதசார முறைப்படி ஒதுக்கபடுகிறது.இந்தியா போன்ற ஒரு பரந்த தேசத்தில் எல்லா மாநிலங்களின் வ்ருவாயும், செலவினங்களும் ஒரே மாதிரி இருக்க முடியாது. தேசிய வளர்ச்சி என்ற கண்னோட்டத்தில் இந்த விகிதாசாரங்கள் வல்லுனர்களார் விவாதிக்கபட்டு தீர்மானிக்கபட்ட ஒரு விஷயம். இது அவ்வப்போது மாறுதலுக்கும் உள்ளாகிறது. மாநில தேவைகள் எல்லாவற்றையும் எல்லா சமயங்களிலும்  பூர்த்தி செய்ய இயலாது. அதிலும் மாநில கட்சிகளின் அரசியல் அறிவிப்புகளினால் ஏற்படும் அதிக சுமைகள் மறுக்கபடும்போது “பாரபட்சம் காட்டப்படுவதாக” குற்ற சாட்டுகள் எழுவது தவிர்க்க முடியாத ஓன்று.
நிதிNITI அமைப்பும்- திட்டகமிஷன்- ஒரு ஒப்பீடு

செயல்பாடுகள்          திட்ட கமிஷன்                               நிதி(NITI) அமைப்பு     

முழு நேர உறுப்பினர்கள்
ஒழிக்கபடும்முன்  இறுதியாக இருந்தவர்கள் 
8 பேர்
திட்ட கமிஷனை விட குறைவானது(எண்ணிக்கை அறிவிக்கபடவில்லை)
மாநிலங்களின் பங்களிப்பு
தேசிய வளர்ச்சி குழு கூடங்களில் திட்ட விவாதங்களில் மட்டுமே மாநிலங்கள்பங்கேற்கின்றன.
மாநிலங்களின் அதிக அளவு பங்கேற்புஎதிர்பார்க்கபடுகிறது
உறுப்பினர்/
செயலர்
செயலர்கள் அரசின் வழக்கமான முறையில் நியமிக்கப்படுவார்கள்
இவர் தலைமை செயல் அதிகாரி என அழைக்கப்படுவார்
பகுதி நேர உறுப்பினர்கள்
பகுதி நேர உறுப்பினர்கள் கிடையாது
தேவைக்கேற்ப பகுதிநேர உறுப்பினர்கள் நியமிக்க படுவார்கள்
நிதி ஆதாரம்
மாநிலங்களுக்கும் மத்திய அமைச்சரகங்களுக்கும்  நிதி வழங்கும் அதிகாரம் பெற்றது
இது ஒரு ஆலோசனை வழங்கும் அமைப்பு. நிதிவழங்கும் அதிகாரம் இல்லை
            



இந்த ஒப்பிட்டை சற்று உற்று நோக்கினால் தெரியம் ஒரு விஷயம். திட்ட கமிஷனுக்கு இருந்த மிக முக்கியமான  நிதி வழங்கும் அதிகாரம்பறிக்க பட்டுவிட்டது. அது நிதிஅமைச்சகத்துக்கு மாற்றபட்டுவிட்டது. அதாவது அமைச்சரவை தீர்மானிக்க கூடிய ஒரு விஷயமாகிவிட்டது. இந்த அமைப்பு ஒரு ஆலோசனை வழங்கும் அமைப்பாக சுருக்க பட்டுவிட்டது. இதன் மூலம் மத்திய அரசில் ஆட்சியில் இருக்கும் கட்சி தங்கள் கட்சி சார்பில்லாத  அரசுகள் இருக்கும் மாநில அரசுகளை கட்டுபடுத்த முடியும். இப்போது சொல்லப்படும்  நிதி பங்கிட்டில் பாரபட்ச குற்ற சாட்டுக்கள் பெரிய அளவில் தொடர வாய்ப்புகள் அதிகம்.
இதைப்புரிந்து கொள்ள திட்டங்களுக்கான  நதி ஒதுக்கீடுகளயும்  தெரிந்துகொள்ள வேண்டும். 
திட்டங்களுக்கான,  நிதி ஒதுக்கீடுகளை மூன்று வகையாக அரசின் நிலயான நிதிக்குழு பிரித்துள்ளது. 
அவைகள்1 திட்டம் சார்ந்த செலவுகள் (P​aSc), 2மத்திய அரசு பரிந்துரைத்த திட்டங்கள் (C​aSSc)​:​​ 3திட்டம் சாரா செலவுகள் - N​P​aSc:​​
(1) திட்டம் சார்ந்த செலவுகள் (P​aSc)​:​​ இவை தான் மத்திய திட்டக் குழுவால் ஒப்புதல் பெறப்படுபவை. இதற்குரிய செலவை மத்திய, மாநில அரசுகள் ஒரு விகிதாசாரத்தில் பகிர்ந்து கொள்கின்றன.
(2) மத்திய அரசு பரிந்துரைத்த திட்டங்கள் (C​aSSc)​:​​ இத்திட்டங்களின் செலவை, மத்திய, மாநில, நகராட்சி, ஊராட்சிகள் ஒரு குறிப்பிட்ட விகிதாச்சாரத்தில் பகிர்ந்து கொள்ள வேண்டும். அதில் மத்திய அரசின் பங்களிப்பு அதிகம் இருக்கும்.
(3) திட்டம் சாரா செலவுகள் - N​P​aSc:​​ இவை மாநில அரசின் திட்டங்கள். இவற்றிற்கான செலவை, மாநில அரசே தன் வரி வருவாய் மூலம் ஏற்க வேண்டும்.
இந்த முறையில் எந்த மாற்றங்களும் அறிவிக்க படவில்லை என்பதால். முதல் இரண்டு வகை திட்டங்களுக்கும் மாநிலங்களுக்கு அளிக்க பட வேண்டிய நிதியை மத்திய அரசு தீர்மானிக்கப் போகிறது.   முந்தை திட்ட கமிஷனிலும்  மத்திய அரசுக்கு அதிகாரங்கள் இருந்தபோதிலும், திட்ட குழு ஒரு ஆலோசனை குழுவாக இல்லாமல் அதிகாரங்களுடன் இருந்த்தால் அதை ஏற்க வேண்டிய ஒரு சூழல் இருந்தது. இப்போது அது இல்லை.
கீர்த்தி பரேக் முன்னாள் திட்ட கமிஷன் உறுப்பினர். அரசுக்கு ஆலோசகராக இருந்தவர். இந்த புதிய  அமைப்பை பற்றி அவர் CNBCக்கு அளித்த பேட்டியில் “ இந்த புதிய அமைப்பில் எந்த மாற்றத்தையும் நான் புரிந்து கொள்ளவில்லை. திட்ட கமிஷன் தேசிய வளர்ச்சிக்குழுவிடம் தன் அறிக்கைகளை கொடுத்த்து. இப்போது நிர்வாக குழுவிடன் தரப்போகிறது. இந்த நிர்வாக் குழுவில் இருக்க போகிறவர்கள் தேசிய வளர்ச்சி குழுவில் இருந்த  மாநில முதலமைச்சர்கள் தானே? மாநிலங்களிலிருந்து திட்டம் என்பது நல்லது தான். ஆனால் ஒதுக்க பட்ட நிதி ஆதாரத்துக்குள் இயலாத திட்டங்களை கொண்டுவந்தால் எப்படி சமாளிக்க முடியம். ?  அண்டை மாநிலங்களுக்கிடையேயான வட்டாரகுழுக்கள் இப்போதும்  சில மாநிலங்களுக்கிடையே இருக்கிறது. இது புதிது என சொல்வதிற்கில்லை”. என சொல்லியிருக்கிறார்.
மாநிலங்களுக்கான  நிதி ஒதுக்கிடு அதிகாரத்தை மறைமுகமாக இந்த மாற்றத்தின் மூலம் மத்திய அரசு எடுத்துக்கோண்டுவிட்டது என்பது பரவலாக  விமர்சிக்கபடுகிறது. 

64 ஆண்டுகள் நிலைத்து நின்று தேசத்தின் வளர்ச்சிக்கு திட்டமிட்டு தந்த ஒரு அமைப்பை கலைக்காமல் திருப்தியில்லாத அதன் செயல்பாடுகளை  தக்க ஆய்வுகள்மூலம்  மாற்றங்களையும்  கண்காணிப்பு முறைகளையும் அறிமுகபடுத்தி புதுரத்தம் பாய்ச்சி சீராக்கி திறன் மிக்க ஒரு அமைப்பாக மாற்றியிருந்தால் மிகுந்த எதிர்பார்ப்புகளுடன் இருக்கும் புதிய அரசின்  மீது மக்களின் நம்பிக்கை அதிகரித்திருக்கும்
(ஆழம் பிப் 15 இதழுக்காக எழுதியது.)